#人間有愛
話說頭先我趕住去學打鼓，
但又餓到就快死，
於是我喺西鐵站買咗盒壽司。
然後我突然發現雖然周圍都係空間，但根本冇空間可以俾我食嘢。
而喺哩個時候我只有10分鐘可以食哩盒嘢，
當時我諗我有兩個選擇:
1)放棄之後嗰堂打鼓堂，上去地面行去老遠搵個地方食咗佢。 因為堂打鼓堂都係得45分鐘，行得嚟都可以轉車返屋企。
2)放棄食物，餓住去上堂，幫個鼓面按摩。
哩個時候我厚住臉皮問個收銀姐姐，
💂:你估附近有冇地方可以食到哩盒嘢?
👩:喺度食囉。
💂:喺度?
我望望周圍，好多位俾人排隊(嗰陣冇咩人)，但係連放支水都冇位，完全唔似可以食嘢。
👩:喺度呀。
之後佢二話不說，拎咗個紙皮盤出嚟，放喺啲嘢飲上面。
👩:喺度食啦。
天呀...
我對姐姐笑住講咗好多次唔該，但姐姐都係一啲表情都冇，我估對姐姐嚟講，哩樣係一件好似食壽司要落豉油咁簡單嘅事。
佢令我發現原來喺哩個咁唔user friendly嘅城市入面，只要我哋肯踏出一步，其實可以令到佢變得好user friendly。
姐姐，你救咗我堂打鼓堂同埋我個肚，雖然你可能覺得好小事，但我真係好多謝你喺我咁無助嗰陣幫咗我。
由幾時開始連我哋香港人都好少幫人，多謝姐姐令我再一次覺得幫人係應該好似落豉油咁簡單。
我哋都多啲幫人啦。
可能下次係你咗幫我，或者我幫咗你😁
P.S.“姐姐”應該讀“遮遮”
P.S.姐姐廣東話好正
#長輩文
Search